الجواز دا أسهل شىء فى الوجود بس محتاج حاجة واحدة وبسيطة جدا ألا وهى الصراحة وعدم الكدب، والناس تدرس بعض ويفهموا بعض بدون أى تمثيل، ساعتها البنت هتبقى فى أمان والشاب هيكون فى أمان والاتنين هيتجوزوا بأقل إمكانيات وهيبقى الموضوع عادى جدا.. إنما اللى خارب الجوازات ومسبب فشل كل الجوازات هو قيام الجوازة على مبدأ الصفقة، وأن الشاب يمضى قايمة وأن أهل البنت والولد يتفقوا على المؤخر ويتفاصلوا فيه وكأنهم عارفين إن هما هيطلقوا قريب، وفى لحظة الحب والمشاعر الحلوة اتقلبت لكام مقابل إيه وأن فى حالة حصول مشاكل هتدفعوا غرامات .
ليه بدايتها بتبقى كده؟
الموضوع بين أى اتنين بيحبوا بعض أكبر من طقم حلل وكوبايات وتكييف وتلاجه وسجاد ومين هيجيب ايه، الموضوع أن اتنين بيطلبوا يشقوا طريقهم سوا ويفتحوا بيت بشكل محترم ومش مخالف للشرع، معظم الأهالى بتقتل مشاعر ولادهم بإنهم بيكونوا سبب فى خراب قصص حبهم بسبب الشروط والتحديات الصعبة، ساعات صح الشاب والبنت بيبقوا غلط فى الاختيار بس عادى ممكن ينفصلوا وتتجوز تانى والشاب يتجوز تانى والحياة تمشى ..ليه الجواز بقى كلمة كبيرة والطلاق كلمة أكبر، كتر الخوف على الشىء بيؤدى لفشله لان بيكون التركيز كبير لدرجه مرهقه فبيؤدى لتعب وفشل العلاقة وإحساس أن المسئولية كبيرة، فى حين أن الموضوع بسيط وهين، المختصر أن يا ريت نعيش حياتك بالشكل اللى يرضينا ويبسطنا وما يغضبش ربنا منا وما نصعبش الأمور على نفسنا، ولكن فى حدود القيم والأخلاق اللى بيسمح بيها ديننا ومجتمعنا.
تم أضافة تعليقك سوف يظهر بعد المراجعة