لسّه السما ...
ف عيونى زرقة مزهزهة
لسّه الحياة ...
أجمل كتير على كفّها
لسّه الورود ...
بتغنّى عطر ف حسنها
وكأنها ...
ياقلبى مزروعة لها
لسّانى بتحدّى الظروف
واكسر ستاير أى خوف
لسّانى مش قادر أشوف
غير بس ضحكة خدّها
طب أعمل ايه ف الحالة دي؟
دنا ف الحقيقة.. بحبها
لكنى خايف م الزمن
خايف على حُبى الكبير
خايف غيام يحدف مطر
طير الغرام يعجز يطير
وإن حتى طار خايف قوي
يرجعلى بجناحه الكسير
خايف عليكى يا ضحكتي
لتموتى قبل ما تبتدي
وساعتها تصبح دمعتي
هى اللى جوّه العين مصير
والوحده ترجع من جديد
تصاحبنى تانى بعدها
طب أعمل ايه ف الحالة دي
دنا ف الحقيقة بحبها
يا بُكرة ياللى جى هناك
هات السعادة مابين إيديك
دنا جوّة منّى فيه ملاك
بالحُب واقف بيناديك
واحنا ف دنيا المغرمين
اتنين ملايكة قُصاد عينيك
ابعت طيورك بالغُنا
والشمس تبقى حنيّنة
يا بُكرة دا العاشق أنا
وأدينى اهُه .. بترجّى فيك
وعشانها أعمل أى شىء
ممكن يفرّح قلبها
طب أعمل إيه ف الحالة دي
م أنا ف الحقيقة .. بحبها
![سيد منير عطية يكتب: بحبها سيد منير عطية يكتب: بحبها](https://img.youm7.com/large/small1020088114651.jpg)
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة