مش هقدَر أقولَّك أنا بحبَّك
الكلمة دى لازم تيجى مِنَّك
إمتى هتيجى ف يوم وتقولها؟
مستنيَّة كتير وأنا جنبَك
حاسة بإنك بردو حاسِسِنى
وهواك بيجينى ويلمِسنى
لكن متردد تصارحنى
بتدارى وتخبِّى ف نفسَك
باين قُدَّامَك أوى حُبى
عينى بتقول.. مش بتخَبِّى
بتكلِّم علشان تسمعنى
واما بتتكلم.. بَسمَعلَك
باين حتى كمان فى كلامى
إن أنت هوايا وغرامى
أكتر من حاجة بتقولَّك
وتشاوِر ليك وتلَمَّحلَّك
بَعرف إيه هوا اللى تحِّبه
وألقانى بموت فيه وبَحِّبه
لو حتى طول عمرى كرهته
بردو بَحِبُه علشان خاطرك
دايماً جوايا وعلى بالى
وبفكَّر فيك وبيحلالى
لمَّا ارسم قصة فى خيالى
لحياة تِبقى معاك وف قُربَك
بتجينى كتير أوى فى منامى
يا أميرى وفارس أحلامى
وأصحى وألاقيك مش قُدَّامى
صوتى بيعلى وبيندهلَك
عايزاك طِيرى وهكون طِيرك
عمرى ما فكرت أبقى لغيرك
واختار قلبى يبقى أسيرك
واخترت حياتى تكون مِلكَك
يقولولك صاحباتى.. اسألهم
إزاى أنا عَنَّك بَحكيلهم
إزاى بفرح لمّا بشوفك
وأما تغيب يوم.. بَسأل عنَّك
يمكِن خايف إنى أصدَّك؟
أو مش متأكد من حُبك؟
طب ليه؟.. ما هو باين ليك حبى
زى ما حاسَّة بردو بحُبك
مش هقدر أقولها.. أنا خجولة
لازم تأخد الخطوة الأولى
مكسوف بمشاعرك تصارحنى؟
وَلَّا بتتكبَّر على قلبَك؟
بتفوت وتروح مِنا إيامنا
بسكوتك بتضيع أحلامنا
وانا عُمرى ما هقدر أقولهالك
الكلمة دى لازم تيجى مِنّك.
صورة أرشيفية
