يا ابن عمرى
فى سوق النخاسة الجوارى بالزوف
جارية تساوى نكلة
وجارية تساوى من الدراهم ألوف
مع أن الشكل واحد
جارية وجارية
بس الفرق للى بصيرته تشوف
فى جارية تخلى سيدها ملك
وتانية تجعل منه شىء
مالوش تكوين بحروف
ما هو أصل
الجارية الصح ملكة
والملكة الحق جارية
وده شىء للعقول الزين معروف
والغالى فى الكون ورا الستر والخبايا
مش للعلن رخيص ومكشوف
ويا بخت من يملك الغالى
والله يكون فى عون
اللى على الرخيص ملهوف
وزمان قالوا الحيا حلاوة الحلا
وعيب الشؤم ع اللى يخلع برقع الخشى والكسوف
وحظك ياللى يخطف قلبك الضى وعبادة الحى
وعينى عليك ياللى بالمتاهة مخطوف
أصل ميزان الكون قانون
ولا عمره يساوى إلا ما بين المتساوى
ولا خالف للحق يوم ولا كان للعدل مخلوف
حط عقلك فى رأسك
تعرف لحالك خلاصك
إن كان لك غرام القلب موصوف
وصُح الحريم تجارة الرجال
لكن يا ولد.. مية واحدة تروح
وواحدة فراقها محال
حبها سرداب بالحشا والجوف
وما تقعدش لحالك
وتتوه بين خيال أوهامك
وإياك تضيع أم قلب رؤوف
وإن كنت عايز تعيش بين الرجال نافش الريش
خد التقيل مش الرايش
ياللى معتقد إنك بالنسا حكيم وفيلسوف
واوعاك يا ولدى
تهين جارية الأصل الزين
وإن سبها لك عشقها
اعشق وصون قلبها الشغوف
وخد بالك يا ابن عمرى
كل الحريم تحب فى الراجل اللى يأنى
إنه يكون كريم.. شديد.. وجدا رحيم وعطوف
![خلود الطيب تكتب: يا ابن عمرى خلود الطيب تكتب: يا ابن عمرى](https://img.youm7.com/large/s820143172728.jpg)
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة